2Ki 23 | NdeIBE | STEP | Inkosi yamema bonke abadala bakoJuda labeJerusalema.

2 Kings 23

UJosiya Uvuselela Isivumelwano

1 Inkosi yamema bonke abadala bakoJuda labeJerusalema. 2 Yasuka yaya ethempelini likaJehova lamadoda akoJuda, abantu baseJerusalema, abaphristi labaphrofethi, abantu bonke kusukela kubantukazana kusiya kuzo kanye izikhulu. Yabafundela bonke besizwa wonke amazwi oGwalo lweSivumelwano, olwafunyanwa ethempelini likaJehova. 3 Inkosi yema ngasensikeni, yavuselela isivumelwano phambi kukaJehova sokumlandela lokugcina imilayo yakhe lemithetho yakhe lezimiso zakhe ngenhliziyo yayo yonke langomoya wayo wonke, ngalokho iqinisa amazwi esivumelwano ayebhaliwe kulolugwalo. Ngakho bonke abantu bazinikela kuso isivumelwano.

4 Inkosi yalaya uHilikhiya umphristi omkhulu labaphristi abalandelayo labalindi beminyango ukuba bakhuphe ethempelini likaJehova zonke izitsha ezazenzelwe uBhali lo-Ashera, lazo zonke izinkanyezi zaphezulu, wazitshisela ngaphandle kweJerusalema eziqintini zeSigodi saseKhidroni, umlotha wazo wawuthwalela eBhetheli. 5 Wakhupha abaphristi bezithombe ababekhethwe yinkosi yakoJuda ukuba batshise impepha emizini yakoJuda lakuleyo ephansi kweJerusalema, labo ababetshisa impepha kuBhali lelanga lenyanga lezinkanyezi zonke zaphezulu. 6 Wakhupha ethempelini likaJehova insika ka-Ashera, wayisa esigodini seKhidroni ngaphandle kweJerusalema, wayitshisela khona, wayichola yaba luthuli wasechithachithela umlotha wayo phezu kwamangcwaba abantukazana. 7 Wadiliza izindlu zamadoda angamawule ezazikhona ethempelini lapho abesifazana ababeselukela khona u-Ashera amaveli.

8 UJosiya waletha bonke abaphristi besuka emizini yakoJuda, wangcolisa izindawo zokukhonzela, kusukela eGebha kusiya lapho abaphristi ababetshisela khona impepha eBherisheba. Wabhidliza izindawo zokukhonzela emasangweni ekungeneni kwesango likaJoshuwa umphathi womuzi, ngakwesokhohlo kwesango lomuzi. 9 Loba abaphristi bezindawo zokukhonzela bengaphathisanga e-alithareni likaJehova eJerusalema, kodwa badla isinkwa esingelamvubelo kanye labanye abaphristi ababedlelana labo.

10 Wangcolisa iThofethi elisesihotsheni saseBheni-Hinomi ukuze kungabi khona otshisa indodana yakhe kumbe indodakazi emlilweni kaMoleki. 11 Entubeni yethempeli wasusa amabhiza amakhosi abakoJuda ayewahlukanisele ilanga, wona ayeseduze lendlu yesikhulu esasithiwa nguNathani-Meleki. UJosiya wasetshisa izinqola zempi ezazehlukaniselwe ilanga.

12 Wadilizela phansi ama-alithare ayakhiwe ngamakhosi akoJuda ephahleni eduze lendlu ephezulu ka-Ahazi lama-alithare uManase ayewakhile emagumeni womabili ethempeli likaJehova. Wawasusa lapho, wawachoboza, aba yizicucu waziphosela eSigodini seKhidroni.

13 Inkosi yangcolisa izindawo zokukhonzela ezazingempumalanga kweJerusalema, ngaseningizimu kwentaba yokuXhwala zonalezo uSolomoni inkosi yako-Israyeli eyayizakhele u-Ashithorethi unkulunkulukazi oyisinengiso wamaSidoni, loKhemoshi unkulunkulu oyisinengiso wamaMowabi, kanye loMoleki oyisinengiso wama-Amoni. 14 UJosiya wabhidliza amatshe okukhonza, waquma izinsika zika-Ashera, wafaka amathambo abantu abanengi endaweni yazo.

15 Le-alithare elaliseBhetheli indawo yokukhonzela eyayenziwe nguJerobhowami indodana kaNebathi owenza ukuba u-Israyeli one, lalelo-alithare lendawo yokukhonzela, wakubhidliza. Watshisa indawo yokukhonzela wayichola yaba yimpuphu njalo watshisa insika ka-Ashera. 16 UJosiya wathalaza ngapha langapha, kwathi ebona ama-ngcwaba amanengi ayelapho ewatheni loqaqa wathi kawasuswe, atshiswe e-alithareni ukulingcolisa mayelana lelizwi likaJehova elamenyezelwa ngumuntu kaJehova owaziphrofethayo lezizinto.

17 Inkosi yabuza yathi, “Ilitshe lesikhumbuzo sengcwaba leliyana engilibonayo ngelani?” Abantu bomuzi bathi, “Liphawule ingcwaba lomuntu kaJehova owavela koJuda, waqalekisa i-alithare laseBhetheli ngazona lezi izinto osunzenzile kulo.”

18 Yena wasesithi, “Liyekeleni lingavumeli muntu awathinte amathambo akhe.” Ngakho bawayekela amathambo akhe kanye lalawo awomphrofethi owavela eSamariya.

19 UJosiya wasusa amathempeli ezindawo zokukhonzela ezisemizini yaseSamariya ayekade akhiwe ngamakhosi ako-Israyeli, ethukuthelisa uJehova, wenza kiwo lokho ayekwenze eBhetheli. 20 UJosiya wabulalela abaphristi bezindawo zokukhonzela phezu kwama-alithare, watshisela amathambo abantu phezu kwawo. Wasebuyela eJerusalema.

21 Inkosi uJosiya yalaya bonke abantu yathi, “Ligcine iPhasika likaJehova wenu, njengoba kulotshiwe eGwalweni Lwe-Sivumelwano.”

22 Lalingagcinwa iPhasika elinjalo kusukela ezinsukwini zabehluleli abaphatha u-Israyeli, lakuzo zonke izinsuku zamakhosi ako-Israyeli lezamakhosi akoJuda. 23 Kodwa ngomnyaka wetshumi laficamibili wenkosi uJosiya, lagcinwa iPhasika likaJehova eJerusalema.

24 Wakwenza njalo uJosiya ukususa izangoma, labahlahluli, labonkulunkulu basezindlini, lezithombe kanye lazo zonke izinto zamanyala ezazikhona koJuda laseJerusalema. Lokhu kwakuyikugcwalisa izimiso zomlayo owawulotshwe encwadini umphristi uHilikhiya ayifumana ethempelini likaJehova. 25 Ngaphambi kwakhe noma ngemva kwakhe uJosiya kakubanga khona inkosi eyafanana laye eyaphendukela kuJehova njengalokhu akwenzayo ngenhliziyo yakhe langomphefumulo wakhe wonke njalo langamandla akhe wonke mayelana lawo wonke uMthetho kaMosi.

26 Kanti uJehova kadedanga ekuvutheni kolaka lwakhe olwavutha kakhulu koJuda ngenxa yazo zonke izinto uManase amthukuthelisa ngazo. 27 Ngakho uJehova wathi, “Ngizamsusa phambi kwami uJuda njengoba ngasusa u-Israyeli, ngiwulahle lumuzi waseJerusalema engawukhethayo, lethempeli leli engathi ngalo, ‘Ibizo lami lizakuba kulo.’ ”

28 Ezinye izehlakalo ngombuso kaJosiya, lakho konke akwenzayo, akulotshwanga yini egwalweni lwembali yamakhosi akoJuda na?

29 Ngesikhathi sokubusa kukaJosiya, uFaro-Nekho inkosi yaseGibhithe waya eMfuleni uYufrathe ukuyancedisa inkosi yase-Asiriya. Inkosi uJosiya wamhlangabeza empini kodwa uNekho waqondana laye wambulala eMegido.

30 Izisebenzi zikaJosiya zaletha isidumbu sakhe ngenqola yokulwa zisuka eMegido zisiya eJerusalema njalo zamngcwabela ethuneni lakhe. Ngakho abantu elizweni bathatha uJehoyahazi indodana kaJosiya bamgcoba ubukhosi bukayise.

UJehoyahazi yiNkosi yakoJuda

31 UJehoyahazi wayeleminyaka engamatshumi amabili lantathu ubudala bakhe esiba yinkosi, njalo wabusa eJerusalema inyanga ezintathu. Ibizo likanina kwakunguHamuthali indodakazi kaJeremiya njalo wayevela eLibhina.

32 Wenza ububi emehlweni kaJehova njengabokhokho bakhe. 33 Inkosi uFaro-Nekho wambopha ngamaketani eRibhila elizweni lamaHamathi ukuze angabusi eJerusalema, wamthelisa kakhulu uJuda amathalenta alikhulu esiliva, lethalenta legolide. 34 UFaro-Nekho wabeka u-Eliyakhimi indodana kaJosiya esihlalweni sobukhosi esikhundleni sikayise uJosiya waseguqula ibizo lakhe wathi nguJehoyakhimi. Kodwa wathatha uJehoyahazi waya laye eGibhithe, wafela khonale.

35 UJehoyakhimi wathela ngenani lesiliva legolide elalifunwa nguFaro-Nekho. Ukuze akwenelise lokho wayethelisa abantu elizweni ngesiliva legolide ngesilinganiso ayebona sibalingene.

UJehoyakhimi Inkosi YakoJuda

36 UJehoyakhimi wayeleminyaka engamatshumi amabili lanhlanu ubudala bakhe ethatha ubukhosi, yena wabusa eJerusalema iminyaka elitshumi lanye. Ibizo likanina lalinguZelida indodakazi kaPhedaya owayevela eRuma. 37 Wenza ububi phambi kukaJehova, njengabokhokho bakhe.